नंदुरबार : भाजपने शिंदे गटाला जोरदार धक्का दिला आहे. नंदुरबारमधील बड्या नेत्याने एकनाथ शिंदे यांच्या शिवसेनेतून बाहेर पडत भाजपमध्ये प्रवेश केला आहे.
शिवसेना शिंदे गटाचे ज्येष्ठ नेते संतोष पाटील यांनी पक्षाला धक्का देत भाजपमध्ये प्रवेश केला आहे.
पाटील हे आमदार चंद्रकांत रघुवंशी यांचे निकटवर्तीय असून, स्थानिक राजकारणात त्यांचा मोठा प्रभाव मानला जातो.
या प्रवेशामुळे नंदुरबारमध्ये शिवसेना शिंदे गटाला आणि रघुवंशी यांना मोठा राजकीय धक्का बसल्याचे मानले जात आहे.
शिवशेना शिंदे गटाला मोठा धक्का: एकनाथ शिंदे गटाचे नंदुरबारमधील नेते संतोष पाटील यांनी भाजपमध्ये प्रवेश केला. ते शिंदे गटाचे आमदार चंद्रकांत रघुवंशी यांचे निकटवर्तीय होते. भाजपचे आमदार विजयकुमार गावित आणि माजी खासदार हिना गावित यांच्या उपस्थितीत संतोष पाटील यांचा भाजपमध्ये प्रवेश झाला. या पक्षप्रवेशामुळे नंदुरबारमध्ये आमदार चंद्रकांत रघुवंशी यांना आणि शिवसेना शिंदे गटाला मोठा झटका बसला असल्याचे म्हटले जात आहे.
मागील ६० वर्षांपासून संतोष पाटील हे रघुवंशी कुटुंबाशी जोडलेले होते. संतोष पाटील हे धुळे-नंदुरबार जिल्हा मध्यवर्ती बँकेचे संचालक आहेत. याशिवाय ते तिलाली गावचे सरपंच आणि विकास सोसायटीचे अध्यक्ष देखील आहेत. नंदुरबार तालुक्याच्या पूर्व भागामध्ये संतोष पाटील यांचा मोठा प्रभाव असल्याचे मानले जाते.
पक्ष सोडण्यामागचे कारण काय?
संतोष पाटील यांनी रघुवंशी यांच्यावर नाराजी व्यक्त करत पक्ष सोडण्याचा निर्णय घेतला. पाटील यांच्या मते, रघुवंशी त्यांच्या निकटवर्तीयांना डावलत आहेत आणि त्यांचे खच्चीकरण करत आहेत. कुठल्याही कार्यक्रमांमध्ये त्यांना बोलवले जात नव्हते आणि विश्वासात घेतले जात नव्हते, असे पाटील यांनी सांगितले. या नाराजीमुळेच त्यांनी रघुवंशींची साथ सोडून डॉ. विजयकुमार गावित यांच्यासोबत जाण्याचा निर्णय घेतला.
भाजपला होणार फायदा
संतोष पाटील यांनी भाजपमध्ये प्रवेश केल्याने येणाऱ्या जिल्हा परिषद आणि इतर स्थानिक स्वराज्य संस्थांच्या निवडणुकीत भाजपला फायदा होण्याची शक्यता आहे. पाटील यांनी सांगितले की, ते डॉ. गावित यांना प्रामाणिकपणे मदत करणार असून, जिल्हा परिषदेवर डॉ. गावित यांची सत्ता आणण्यासाठी प्रयत्न करतील. त्यांच्या या प्रवेशामुळे नंदुरबारच्या राजकारणातील समीकरणे बदलण्याची शक्यता आहे. पाटील यांच्यासोबतच त्यांचे समर्थकही भाजपमध्ये सामील झाल्याने रघुवंशी गटाची ताकद कमी होण्याची चिन्हे आहेत.